دونن آخشام چاغی سن سیز منی آغلاتدی یاغیش
یادیما سالدی سنی مطلبینه چاتدی یاغیش
کوچه لر اولدو گؤزومده یئنه بیر آرپا چایی
منی سن سیز نئجه نیسگیل سئلینه آتدی یاغیش
اودو سؤندورمه گه سو قایداسی دیر آمما دونن
کؤزه ره ن کؤنلومو یاغدیقجا آلوولاتدی یاغیش
يادا سالدي اؤ ياغيشليق گونو كي اوندا مني
كَپنَك تك باشينا شوقيله اويناتدي ياغيش
دامجی دامجی سنه لای لای دئدی قوینومدا منیم
نه دئیم بلکه سنی کورپه یه اوخشاتدی یاغیش
بوخاغيندان آخاراق بيلدي شيرينليك شانيسان
گول اوزوندن سوزولوب بال فَره سين داتدي ياغيش
دوداقين قيرميزي گوللر كيمي آچميشدي سنين
سوزولن واخت او دوداقلاردا قانا باتدي ياغيش
او قدر مستیدیم هئچ بیلمدیم آخیر نه زامان
سینه م اوسته ساریلان تئل لری ایسلاتدی یاغیش
سورا بیلدیم آپاریب قورد کئچینین شنگولوسون
سنی مندن آلیب آنجاق منی آلداتدی یاغیش
دونن آخشام گئنه بير سودا دا گوردوم كي منه
آجيليقلا او شيرين خاطيره ني ساتدي ياغيش
اويانيرديم كي باشيم دَيدي ملامت داشينا
مني رؤيادان اویاتماقدان اؤزي ياتدي ياغيش
مصطفی عزتی
درباره این سایت